Pan-Somali Council for Peace and Democracy (ISRAACA)
1201 Pennsylvania Ave, NW #300 PMP #49 Washington, DC 20004
Telephone: (202) 661-4653 Email: Webmaster@israaca.org
www.israaca.org

Warsaxaafadeed ku Saabsan Shirka Dib-U-Heshiisiinta Soomaalida ee Eldoret

October 7, 2002. Washington, D.C.

Ururka Israaca Ummadda Soomaaliyeed (Israaca) wuxuu ka mid yahay ururrada ku hawlan dib-u-soo celinta qarankii Soomaaliyeed ee burburay. Ururkani wuxuu ka kooban yahay qeybaha bulshada oo dhan, waxaana ka mid mid ah xubnihiisa aqoonyahanno iyo xirfadlayaal badan. Ururka Israaca oo la abuuray sanadkii 1998, waxaa ujeeddooyinkiisa waaweyn ka mid ah inuu raadiyo sidii uu ugu dhamayn lahaa khilaafka hab ku dhisan caddaalad, nabadgelyo iyo wadahadal. Wuxuu kaloo Ururkani doonayaa inuu hormariyo dhaqan ku salaysan nabadgelyo isagoo adeegsanay waddada wadahadalka iyo dib-u-heshiisiinta, islamarkaasna ilaalinaya midnimada iyo sharafta Soomaaliyeed. Himilada fog ee Ururka Israacu waa dhisidda bulsho deggen oo leh nidaam dowli ah oo wanaagsan, kuna wada hoos-nool qaab-dhismeed ka kooban bulsho kala duwan oo ku dhisan caddaalad iyo horumar.

Xarunta Ururka Israaca Ummadda Soomaaliyeed waxay ku taal magaalada Washington D. C. Haseyeeshee, waxaa laamaha iyo xubnaha ururkani joogaan inta badan magaalooyinka waaweyn ee Ameerika, Canada iyo Yurubta Galbeed. Sidoo kale, waxay laamaha iyo xubnaha ururkani joogaan wadamada Carabta, dalalka Afrika iyo Soomaaliya. Wixii faahfaahin ah kala xiriir bogga internet-ka ee ururka oo ah www.israaca.org.

Ururka Israacu, isagoo ka faa'iideysanay fursaddan, wuxuu marka hore gaarsiinayaa mahad ballaaran dowladaha xubnaha ka ah Urur-Goboleedka IGAD, iyo gaar ahaan dowladda iyo shacabka dalka Kenya isagoo uga mahad celinaya dadaalka ay ku doonayaan inay Soomaaliya kaga dhaliyaan nabad waarta. Ururkani wuxuu si weyn u taageerayaa shirka ay ku baaqday IGAD, isagoo rajaynaya inay ka dhalato shirkaas nabad buuxda. Sidaa darted, Ururka Pan-Somali Council for Peace and Democracy (Israaca) wuxuu ka codsanayaa dadka Soomaaliyeed, meel kasta oo ay joogaan, inay taageero buuxda siiyaan, ayna wixii ay ku kordhin karaan oo wanaag ah ku kordhiyaan shirka si loo dhameeyo dagaallada sokeeye, loogana dhaliyo Soomaliya nabad waarta.

Ururka Israaca Ummadda Soomaaliyeed wuxuu jecel yahay inuu u soo jeediyo Guddiga Farsamada ee abaabulaya shirka qodobbada soo socda ee ku saabsan habka iyo farsamada la xiriirta hagaajinta nidaamka iyo nuxurka shirka:

1. Ururka Israacu wuxuu qabaa in habka loo abaabulayo shirku uu noqdo mid furan oo qof walba uu arki karo. Taariikhda loo qabtay in shirku qabsoomo way dhowdahay, laakiin ilaa iyo hadda ma jirto wax loo soo gudbiyey dadka shirka ka qeyb galaya sida ajandaha, qaabka iyo arrimaha kale ee muhiimka ah ee laga wada hadlayo. Sidaa darteed, Ururka Israacu wuxuu ku boorrinayaa Guddiga Farsamada ee IGAD inay u gudbiyaan dadweynaha Soomaaliyeed iyo dadka ka qeybgalaya shirka dokomentiga la tixraacayo iyo habka looga qeybgalayo shirka. Sidoo kale, waa in guddiga farsamadu uu qeexaa doorka ka-qeybgalayaasha iyo kaalinta ay IGAD, bulshada caalamka iyo bulshada rayadka ah ee Soomaaliyeed ku kala leeyihiin shirka.

2. Ururka Israacu wuxuu rumeysan yahay in shirkani uu yahay mid muhim ah oo ay natiijadiisu wax weyn ka tareyso dib-u-heshiisiinta ummadda Soomaaliyeed ee dhibaateysan, iyo nabadgelyada Geeska Afrika. Sidaas darteed, Ururuka Israacu wuxuu soo jeedinayaa in sida ugu dhaqsaha badan loo dhammeeyo waxyaalaha la xiriira diyaarinta shirka. Ururka Israacu wuxuu ka digeyaa in lagu dhaco gafaf waxyeelleyn kara ka-guul-gaarista shirka. Ururka Israacu wuxuu rajaynayaa in dowladaha xubnaha ka ah IGAD ay ka gudbaan muranka iyo is-qabqabsiga, ayna isla gartaan hal waddo oo keeni karta sidii nabad iyo xasillooni looga dhalin lahaa Soomaaliya iyo Geeska Afrika oo dhan. Ururka Israacu wuxuu soo jeedinayaa in dalalka safka hore ay qaataan siyaasad aan u kala eexanayn kooxaha iyo kale ee ka-qeybgalayaasha kale ee shirka.

3. Ururka Israacu wuxuu ku boorrinayaa dalalka safka hore inay ku midoobaan hal hannaan ama qaab oo kaliya. Ururkani wuxuu soo jeedinayaa in qaabkaasi uu noqdo mid lagu dul dhisayo natiijadii ka soo baxday Shirkii Carta. Wuxuu u arkaa in arrintani ay tahay mid macquul ah, islamarkaasna waafaqsan xaqiiqada ka jirta dalka. Isagoo ka ambaqaadaya in hoggaanka Dowladda KMG ah lagu qancin karo inay oggolaato natiijada shirka, xitaa haddii iyada lagu baddalayo dowlad kale oo la isku raacsan yahay, looma baahna in mar kale laga soo billaabo eber. Taasi waxay keeneysaa in la lumiyo wixii hanti iyo waqti la geliyey dib-u-heshiisiinta, waxayna dhaawacaysaa niyad-wanaaggii ka danbeeyey heshiikii Carta.

4. Sida uu qabo Ururka Israacu, waa in dadka Soomaaliyeed loo oggolaado inay ka qeyb galaan wajiga hore ee ah gogol-xaarka iyo diyaarinta shirka. Waxaa jira dad badan oo Soomaali ah oo jooga dalka gudihiisa iyo dibaddiisaba oo si dhab ah u danaynaya nabadaynta Soomaaliya, islamarkaasna aan ahayn xil-doon. In ay ka qeyb-galaan shaqsiyaadka noocan ah wajiga gogol-xaarka shirku waa muhim waayo ka qeyb-galkoodu wuxuu keeneyaa in dadka Soomaaliyeed dareemaan inuu iyaga ka yimid nidaamku ee aan dibadda looga keenin. Taasina waxay dhalinaysaa inay aqbalaan natiijada.

5. Isagoo tixgelinaya xiisaha cusub ee ay muujiyeen wadamada caalamku, Ururka Israacu wuxuu soo jeedinayaa in la siiyo door wax ku ool ah bulshada caalamka ee ka baxsan IGAD. Dalalka Yurub iyo Mareykanku waxay, gaar ahaan, muujiyeen xiiso weyn oo ku aaddan shirka soo socda. Iyadoo laga faa'iideysanayo waaya-aragnimada la xiriirta shirarkii hore oo uu ku jiro kii Carta, Ururka Israacu wuxuu qabaa, in ka-qeybgelinta Marykanka iyo Midowga Yurub ay kordhinayso fursadaha lagu hirgelinayo heshiika la gaaro. Sidoo kale, iyadoo la eegayo xiriirka qotada dheer iyo dhaqanka ay dalalka Carabta iyo kuwa Islaamku la leeyihiin Soomaaliya, wuxuu Ururka Israacu qabaa in si toos ah looga qeyb-geliyo Uruka Jaamacadda Carabta iyo Ururka Dalalka Islaamka ah. Sidaa darteed, Ururka Israacu wuxuu soo jeedinayaa in labadan qeybood laga qeyb-geliyo shirka iyadoo aan laga qaadeyn hoggaaminta shirka IGAD.

6. Si looga miro-dhaliyo shirka, Ururka Israacu wuxuu soo jeedinayaa in qeyb kasta oo ka mid ah bulshada Soomaaliyeed loo oggolaado in ay ka qeyb-gasho shirka. Arrinta la xiriirta metelaadda ama ka-wakiil-noqoshada dadku waa mid aad muhiim ugu ah heshiiska Soomaaliya. Haddaba, waa in tixgelin dheeraad ah la siiyo arrintaas inta uusan shirku billaaban. Ururka Israacu wuxuu ka digayaa inaan lagu dhicin gefefkii hore oo kale oo aan loo oggolaan kooxaha hubeysan inay iyagu faramaroorsadaan inta kale oo ay habka dib-u-heshiisiinta iyaga oo kaliyihi ay ka taliyaan.

7. Inta uusan billaaban shirku, waa in dhammaan ka qeyb-galayaasha oo ay ku jiraan kuwa ajnabiga ahi ay isku waafaqaan xeerarka aasaasiga ah ee lagu wadayo shirka, waana inay dhammaantood ballan-qaadaan inay fulinayaan natiijada ka soo baxda. Waa in la isla garto oo la isla oggolaado ciqaabta ama waxa lagu samaynayo ciddii diidda inay fuliso natiijada shirka. Tusaale, waa in dowladaha xubnaha ka ah IGAD ay isla gartaan inaysan u oggolaan inay soo galaan dalalkooda kuwa diida inay hirgeliyaan heshiiska ka soo baxa shirka.

8. Ururka Israaca Ummadda Soomaaliyeed wuxuu soo jeedinayaa in aan la abaalmarin kuwa adeegsada dagaalka iyo xoogga si ay u gaaraan hadaf siyaasadeed. Danta guud ee ummadda waa inaan la oggolaan in laga hormariyo danaha gaarka ah ee kooxaha iyo shaqiyaadku ay wataan. Sidaa darteed, Ururka Israacu wuxuu ugu baaqayaa bulshada caalamka inay si toos ah ugu caddeeyaan arrintan ka qeyb-galayaasha shirka.

9. Ururka Israaca Ummadda Soomaaliyeed wuxuu soo jeedinayaa in shirku uu ku talagalo sidii loo samayn lahaa hannaan lagu dul-dhisi karo dowlad loo dhan yahay oo Soomaaliya oo dhan metasha. Sidoo kale, Israacu wuxuu soo jeedinayaa in shirku uu abuuro guddi dib-u-heshiisiin iyo hanti-isu-celin, kaasoo ay hey'adaha caalamiga ahi qarashkiisa bixiyaan. Guddigana waa inuu noqdo mid isagoo ka madax-bannaan, haddana la shaqeeya dowladda lagu dhiso shirka.

10. Ururka Israaca Ummadda Soomaaliyeed wuxuu ku tirtirsiinayaa Guddiga Farsamada in lagu daro qodobbada laga dooday danbiyada la xiriira ku xad-gudubka xuquuqda aadanaha iyo xaalufinta deegaanka si loo xaqiijiyo in kooxaha iyo shaqsiyaadka geystay xadgudub loola xisaabtamo. Ururka Israacu wuxuu ka codsanayaa Qaramada Midoobay, Midowga Yurub, Midowga Afrika, Dowladaha Mareykanaka iyo Canada inay bixiyaan qarashka iyo waxyaalaha kale ee uu u baahan yahay Wakiilka khaaska ah ee u qaabilsan Qaramada Midoobay arrimaha xuquuqda aadanaha Mudane Ghanim Al-Najjar, si uu u guto waajibaadkiisa la xiriira baaritaanka xadgudubka xuquuqda aadanaha iyo dambiyada dagaalka ee dhacay sanadihii la soo dhaafay.

11. Ugu danbeyntii, Ururka Israacu wuxuu soo jeedinayaa in waxyaalaha ka dhacaya shirka sida wadahadallada, baaqyada iyo go'aannada dhammantood la daabaco, loona baahiyo dadweynaha Soomaaliyeed waayo xaq bay u leeyihiin inay ogaadaan sida aayahooda loo qaabaynayo.

Board of Directors
Pan- Somali Council for Peace and Democracy
Washington DC, USA
Contact info: Abukar Armam (Chair of Israaca)